Phuloh Lenmawi

Phuloh Lenmawi

H.Lalthazuala

Tlangval, palian thelh thawlh, inkhaithli nalh tak, sambu tha tak, sam dum tha hlep hlawp bawk si, sam ngil tha tak, dar pharh hlai mawi tak chen vel suau a sam zuah, a sam zuah hi a va inhmeh tak em ti tu ngah tak, zai thian ropui Vanlalruati leh a u Vanhlupuii te telna Beat Group “The Vans” a lead guiterist mawhphurhna la tu, mipui hmaa a inlan hnu a rimawi khawvel boruak mai baka a sakhmel that larpui tel zel, mizo rocker ropui Jeremy Zobiakvela sangawi zawnpui hlun, perhkhuang hrui thum perh thiam hmingthang, PB Liantluanga hla phuah ‘Pholoh Lenmawi’ tih hla zet hi chu a mawi zia sawifiah zo thei tur hian duhlian tawng hausakna leh rilna hian a tlin phak lo, a phawk phak lo a ni ber awm e. A thluk kal phung mawlte si hi a mawi em a ni.

He Pawih bawihtlung tlangval hmelchhelo tak mai hi zorimawi chanchinah hian a bung pawimawh lai taka sawi tel zel a nihna chhan tur hi kawng hrang hrang in a awm a ni. Kum 1972 vel atanga hriat hlawh chho tan a ni ber ang. Zaithiam hmingthang Vanlalruati te unau te nena an Beat Group din ho ‘The Vans’ ah lead guiterist a nih hma pawhin, thianthate nen band angin an lo play ho tawh thin a. “The Vans” a a telve lai hi a hringnun kawnga a bung pawimawh lai leh amah ngei pawhin nuam a tih lai ber a nih a rin thu ‘The Vans’ a a perhkhuang thum perhtu, a nau (A chhang chhang leh chiah) PB Lianzama chuan a sawi.

‘The Vans’ a tel hnuah Mizo Rocker ropui leh huhang ngah tak Jeremy Zobiakvela te nen ‘Creation Flame’ an din leh a, Creation Flame ah hian perhkhuang hrui thum a perh ta thung a, ‘Creation Flame’ an din kum hi Kum 1977 ah khan a ni a, a tel ve tawhna group hian state level beat contest ah lawmman pakhatna an hui deuh zel a ni. Kum 1979 kum tawp lamah Jeremy Zobiakvela te nen vek hian ‘Crimson Dust’ an din leh a, crimson Dust ah hian Chaltlang pum chhuak, guiterist ropui, hla phuah thiam leh hla thluk siam thiam ropui, Rohmingthanga (Rawa) chu lead guiterist a ni nghe nghe a, perhkhung hruithum a chang zui leh bawk.

Mizo chanchina, zirtirtu hmasa ber zinga tel ve Pu Chhunbura fapa hming koh Upa P Lalzuala chuan fa pasarih a nei a, mipa pathum leh hmeichhe pali an ni a, PB Liantluanga hi a upa ber dawttu niin, an unau zingah hian PB Lianzama leh PB Lianthangpuii phei hi chu tun thleng a rimawi lama rampum hriat hlawh an ni reng a, mizo hmeichhia te zingah hian PB Lianthangpuii anga Keyboard tum thiam lama hriat hlawh leh hming chher zaithiam bawk si hi an la awm lo tiin sawi ta ila dawt sawi kan nih loh hmel hle mai.

PB Liantluanga nau PB Lianzama hi a u PB Liantluanga te nen a play ho thin, unaua group khata lo che tla ho a, rimawi thlarau lo chang ho thin an ni a, a u PB Liantluanga pianpui mizia hrechiangtu tur pawh a ni ve hrim hrim e.

PB Lianzama’n a u hla phuah chungchasng a sawi danah chuan, amah ngei pawh a la upat bik loh avanga a u hla phuahte, a hun laia a phuah ni leh kum te nen a lo chhinchhiah thlip thlep nachang a hriat bik loh thu sawiin, miten an hriat tlanglawn ve deuh, PB Liantluanga hla phuah te chu paruk vel an nih a rin thu leh miten an sak lar lem loh, tlangzarh lem loh hlaphuah eng zat chiah nge a neih a, a lo vawn that a hriat bik loh thu leh lo awm ta pawh nise hriat chhuah leh emaw, han hai chhuah leh emaw a har tawh tur thu a sawi a ni.

Rebecca Saimawii leh Vanlalhmangaihi te pawhin an sa nual bawk a, Radio kaltlang a ni emaw, audio album kaltlang a ni emaw, a hun lai na na na chuan PB Lianzama hla phuah, a hun laia zaithiam lar ten an sak hi an lar thei thin hle a, mipui nawlpui rilru hneh thei chi, mite rilrem zawng tak hla thluk siam thiam lamah ama thian te ngei, rimawi khawvela a sangawi zawnpuite fak a hlawh thei thin hle a ni.

A nau PB Lianzama hi, PB Liantluanga’n Jeremy Zobiakvela te, eizawnna thil avang a a play pui hman tak loh hnuah pawh Basist rawn ni chhoin, ‘Crimson Dust’ hunlai te phei kha chuan Mizoramah PB Lianzama aia Basist hriat hlawh leh lar hi an awm bik lo. Tleirawl tirh te atanga zu in ngai lo, Crimson Dust vanglai vela, bass pertu lar, concert nikhua a, a thiante, a sangawizawnpuite, zu in pawh dawhthei taka nghak zel thin a ni a, a fakawm hle a ni.

PB Liantluanga hi hla phuah leh guiter play ah ringawt talent nei tha a ni lova, zai pawh a thiamin a aw a mawi hle niin, a sangawizawnpui thin, a thian hlui ten an sawi thin bawk a ni. Concert ni khua a hla hnih khat han sak ve zoh bak hi mipui hmaah a zai tam vak lova, zai lama han intihlar tumna a neih lem loh bakah, han inthehlat tum viau mai kha a pianpui mizia a nih loh thu a thian hnaivai tak pakhat chuan a sawi.

An pu, primary zirtirtu hmasa, missionary ho chher chhuah, Chhunbura atanga sakhaw mitak chhungkua an ni a, zai ngaina, inkhawm peih, chhungkua a tui tak a zai ho dal dal thin, kristian hlabu a sap hla lehlin thluk mawi tak tak hre tam leh sa hnem, zai ngaina thlah kal zel an nih avang a ni’ang e, an unau ho hi music kalphung an man hle mai a, a nau te pahnih PB Lianzama leh a farnu te zinga naupang ber PB Lianthangpuii phei hi chu tun thlengin ram pum huap rimawi lama puipunna ropui tak takah hmatheh ber ber an la ni ta fan reng a nih hi. PB Lianzama ngat phei hi chuan rimawi lama a talent tha tak mia hi rawngbawlna lam huang thlengin a hmang tangkai hle mai a, Dawrpui vengthar kohhran zaipawl, Pastor bial zaipawl, Central YMA Zaipawl, Dawrpui Vengthar Branch YMA Zaipawl ah te conductor lo ni tawh thin in, Rev. Vanlalnghaka rawngbawlna, Canada leh USA ah te zaipawl ang leh Quarted ang tein a lo tawiawm fo tawh thin bawk a ni. E!!!..tak ana!!.. ‘Pathian hmangaihna’ Gaither Vocal Band(GVB) ho hla mawi tak mai mizo tawnga letling tu hi PB Lianzama a ni a, sap hla pahnih ‘Hard & Soul’ tih leh ‘Rock N Roll’ tih hla a phuah bawk a ‘Rock N Roll’ tih hla chu Zonet Cable TV buatsaih ‘Justice for Christ’ beat contest endiktu te zinga a tan ve khan a mah ngeiin a sak nghe nghe kha, khami tuma a lo puibawmtu, guiterist Hmingpuia guiter play mawi zia mawlh mai kha kan hla hre hlawm ang chu.

Hla phuahtu ropui Vankham fate nen a, Beat Group te lo din ho tawh, hmun tam taka lo zai hova, hla te lo zir ho reng reng thin, Aizawl veng pakhat Dawrpui venga lo seilian ho ta chu, Vankhama hla thu ten PB Liantluanga hringnunah hian nghawng thuk tak a nei chu a ni phawt mai a, ‘Phuloh Lenmawi’ tih hla ah hian Pu Vankhama hlaphuah dan zia rang a lang thei tlat maia, a hla thu hamn leh a remkhawm dan kalphung hi Pu Vankham hla phuah dan kalphung nen a inhnaih hle a ni. A hla hrim hrimin ngaihni a beina laiah erawh Pu Vankhama aiin a sangin a thuk mah zawk hial niin a lang. A thluk mawlh mai hi a amawi chung chuang em a lawm mawle!!!

He hla, lung ti run ngei ngawih tak mai hi Ni 17.3.1977 kum khan All India Radio Aizawlah Vanlalruati hian han thunin a thun ni la la, zan lamah tih chhuah (Broadcast) a ni a, AB – 95 leh CDM – 1312 ah vawn that tlat a ni a, Radio lam hotu te pawhin an roh hle a ni.

Sial rangin Sial rang a hring tiin kan pi puten an lo sawi thin a, a lo dik nangiang mai le, PB Liantluanga fate, PB Lianzama, PB Liansangzuala, PB Lianmawia (Ate-a) te hi zorimawi khawvela mite hriat hlawh, mahni tawka hmingchher thiau, niin, PB Lianmawia (Ate-a) hi Boomerang Vocalist niin a u chiah PB Liansangzuala hi Magdalene Band member ni bawkin, an upa ber PB Lianhminga hi Albatross Keyboardist a ni bawk.

PB Liantluanga fate zinga upa ber PB Lianhminga ngat phei hi chu zo rimawi khawvelah hian a thawh hlawk hle a, Vanlalsailova lengzem audio album lar takte kha a kut chhuak anga sawi theih a ni hial mai. Kha album a hla pathum tih chauh loh chu PB Lianhminga music track siam vek an ni nghe nghe. BD-a hla phuah ‘Lungrun’ tih hla Elizabeth Zodinpuii sak music track kha a kutchhuak a ni bawk a, C. Sanga hla hi a music track siam deuh vek anni bawk. Liandingpuii audio album, mizo leh english te kha a kutchhuak deuh vek anni bawk a, Joseph Zaihmingthanga audio album ah te kutchhuak a ngah ber bawk a ni. HC Sanglura hla phuah, ‘A mak mang e’ tih hla Lalrindiki Khiangte in mawi taka a sak te hi PB Lianhminga kut chhuak a ni bawk. A thawh hlawk teh a sin mawle!!!!

Hla hi, a thui leh thui loh lam emaw a chang tih sei duah lam emaw hi a lo ni ber lem lo a ni maithei, ‘Phuloh Lenmawi’ tih hla ngei pawh hi chang khat leh a thunawn chauh a ni a, mahse, a thluk leh a thuin rilru a hneh dan leh a fan dan hi a thuk deuh raih mai a, dangdai ve tak chu a ni chiang khawp mai!! He hla phuahtu PB Liantluanga leh a sa lartu zaithiam hmingthang Vanlalruati te hian famdairial chang tawh mahse zo rimawi chanchunah hian an hming hi a dai ngai lovang.

PB Lianhminga naute ho, PB Liansangzuala hi MAgdalene bassist a ni a, Atea hi Boomerang vocalist a ni a. PB Lianhminga te unau hrim hrim hi Zorimawi khawvelah hian mahni tawka hmingchher thiau vek an ni. An va chhuanawm em!

‘Phuloh Lenmawi’ tih hla mawi dangdai tak mai hi Late 70s leh Early 80s vela hla lar ber pawl a tling phak a, tun hnaiah, LPS Youth Icon Star Hmingsanga’n a rawn sa thar ve leh bawk a, awle, a tawp khar nan ‘Phuloh Lenmawi’ tih hla thu lung ti run ngeih ngawih tak mai hi i han chhawp chhuak tel teh ang hmiang.

Phuloh Lenmawi
Phuahtu – PB Liantluanga
Satu – Vanlalruati leh Hmingsanga

Awmkhua a har dawn changin,
Lunglai a dam thei si lo;
Chungkhuanu ruata ka chan reng chu,
I thinlai haltu mai ni maw.
Tawnmang mawl mai thleng pawhin,
Linglai a dam thei si lo;
Min tiriang thlawn mai tur reng’an,
Ka tawn che Phuloh Lenmawi.

Awle mangtha ka thinlai khamtu ber,
Mual chu liam rawh –
I zun ngai hnuchhawnin;
Ka nghilh lawng che aw Parte,
Fam dairial chan thleng pawhin;
Hei hi maw an sawi Di zun ngaih
Tuar ka thiam lo Di lenmawi.

NEXT RECORD – [Auditions]

Blue wave records label chuan thawhpui tur a dap chho leh dawn ta.
2013 kum atangin a lo ti tan chho tawh a,thlan chhuahte chu theih ang angin an buaipui thin a,hlawhtlina duhawm tak2 artist te pawn an chang chho ve zel a,kan lawmpui tak zet a ni.
Tunah hian nasa zawka hma lak tum belh a ni a, kan lo tih tawh dan angin demo lo thawn theih a ni a,
Phone hmanga record poh kan pawm vek a ni…
kan thlan chhuah chu theih ang angin kan buaipui chho leh dawn a ni.

Lo ngaihven rawh le

Demo thehluh dan tur
Record neihsa / mobile record
Thawnna tur : bluewaverecords@gmail.com /8118911091

 

A VA MAK EM

A VA MAK EM

C. Lalthazuala

Kan pipute thawnthuah chuan Hlaphuah thiam hmingthang Pi Hmuaki kha thangtharte hlaphuah ve tur a lo phuah zawh sak vek mai ang tih an hlauh avanga a nungchunga phum nia sawi a ni a. Amaherawhchu hla hi phuah zawh ngawt chu a lo har dawn viau mai le.

Pi Hmuaki zamual liam hnuah hlaphuah thiam ropui tak tak an rawn piang ta zel a. Zofate tihlimtu leh awitleitu, Mizo literature tihmasawntu an rawn piang chhuak zel a. Tunlai thangthar hlaphuah thiam ropui tak tak zingah pawh H.C. Lalsanglura hi zorimawi huanga a thawh hlawk ber pawl chu a ni chiang mai. Zorimawi  par tivultu leh zorimawi zar tibuk tu te zingah chhiar tel a ni reng tawh ang.

H.C. Lalsanglura hian hla 100 vel zet a phuah tawh a. Audio – Album pathum siam tawhin, Teuhlo mai, Ka va ngai dawn che em, A lo mak thei ngei mai, tih Audio-Album te hi a siam tawh a, music video hi 20 vel a siam tawh bawk a ni. H.C. Lalsanglura hi C. Lalrinmawia te, Lalnunmawia (Valtea) te ang thoa hlaphuah thiam leh zaithiam a nih kawp tlat avang hian a boruak kentel hi lian ve hrim hrim bawk a. Hla a phuah reng rengin a thluk han siam vel nan Guiter a hmang tam ber a. Tin, Keyboard pawh a hmang thin bawk a ni.

Ama hlaphuah ngei “Teuh lo mai” tih hla avanga Mizo mipuite hriat hlawh H.C. Lalsanglura hi kum 1976 Feb. 29 ah Sateek khuaah lo piangin unau piangchhuak mipa 3 leh hmeichhia 3 zinga a upa lama chhiara a pathumna chiah a ni a. A hringtu nu Biakmawii hi Sateek khaw thenawm chiah Phulpui khawchhuak a ni a, Sanglura pa Sangbilha hi sipai (Assam Rifles) a nih avangin Mizoram hmun hrang hrang Sateek, Sialsuk, Tlungvel, Baktawngah te a awm kual tawh a. Chutiang a nih avang chuan Mizoram tlangram mawi dangdai ziate, zokhaw nun nuam leh hlimawm tak maite, zokhaw chhelvela zolentu thing dingte leh pangpar chi hrang hrang par vul chiai mai thin sir vela hramthiam va chi hrang hrang awrawl tawpa lo chiar noh noh mai te chuan H.C. Lalsanglura hi hlaphuahthiam hmingthang ni turin a lo kaihruai a ni ngei ang le.

H.C. Lalsanglura pi (a nu nu) Phulpui khua a awm chuan Sanglura hi naupangte a nih laiin Phulpui khuaah hian a hruai reng reng a, sikul chawlh veleh Phulpui khuaah hian a hruai phei thin a, rei tak tak Phulpui khuaah hian a pi bulah hun a khawhral thin a. Zokhaw nun nuam leh thianghlim tak pawh a hre chiang tawk viau ngei ang. A pi hian mut hmunah te Mizo thawnthu ngaihnawm tak takte a hrilh thin a, “Zawlpala leh Tualvungi” chanchinte a hrilh thin bakah Phulpui khaw mawi tak chung chiah tlangdung mawi em em maia, Tualvungi pasal Zawlpala thlanlungahte hruaiin Zawlpala thlan te chu a enpui thin bawk a ni.

H.C. Lalsanglura hian mizo hlaphuah thiam lar tak tak zingah ngaihsan zual bik pali a nei a, Lalzova, F.Rokima, C. Durthanga leh Lalbiakdika (BDA) te chu a ngaihsan ber ber palite chu an ni. All India Radio Aizawl Station -ah hla 20 bawr vel a thun tawh a, a hlaphuah hi zai thiam lar ber pawl tling phak ten an sak sak nasa hle a, Zaithiam hriat hlawh lutuk lemlo te pawhin an sa nasa hle tho bawk a ni. A hlaphuah dan kalphung leh a thluk siam dan kalphung hrim hrim hi mizo lunglen zawng tak leh mizo rilrem zawng tak an ni tlangpui a, a hla thluk kalphung hrim hrim hi “Lengzem” hla nen a inhmeh bik thin hle mai a, hei tak hian amah hi mi lungleng thei tak a ni tih a pholang chiang hle a ni.

H.C. Lalsanglura hringtunu Biakmawii hi Lalngengpuii Tochhawng nu u chiah a ni a, zaithiam leh hlaphuahthiam hmingthang Lalngengpuii Tochhawng tenen nute unau an ni tihna a nih chu. Sanglura hian hla a phuah reng rengin a thu aiin a thluk a nei hmasa thin a, a rilruah a thluk a rawn piang hmasa phawt a, a thlukah chuan a thu a bel leh thin a ni. A hla lar tak tak amah ngeiin a sak lar te hi P.B. Lianhminga siam anni tlangpui bawk. Zorimawi zinkawng a zawh chhoh tanna hi Senior Departmen-a a awm lai, High School a zirlai atangin a ni ber a, High School a zir lai Senior Departmenta awm lai atangin mipui hmaah a zai tan a ni. Ama hlaphuah ngei “Teuh lo mai” tih a rawn sak atangin mizo mipa zaithiam lar ber pawlah a rawn invawrh chho ta a ni ber ang chu.

Sanglura hian lengzem hla tha tak tak a phuah tam hle a, chung a lengzem hlaphuah tha tak tak zingah rau rau pawh “A va mak em” tih hla kher kher hi chu a tha chungchuang ngawt mai, a ngaithlatute rilruah pawh atla ber a ni hial ang. He hla mawi dangdai tak mai leh hla thu mawi em em mai, ngaihno bei bawk si, a thluk mawi dangdai em em  bawk si hi mizo hmeichhe zaithiam lar zinga a ber kai phak pahnih Lalrindiki Khiangtel leh Sanglura unaunu Lalngengpuii Tochhawng ten an han sa lar leh nghal a, a hunlai na na na kha chuan “A va mak em” tih hla baka hla lar hi mizo lengzem hlaah hian a awm bik chuang lovang.

Lalngengpuii Tochhawng leh Lalrindiki Khiangte in a sak dan a hlathu a dan hret avangin inhnialna pawh a siam deuh phat anih kha. “I sakhmelah sar a zam em ni” tih laia “Sar zam” tih lai tak, a phuahtuin a phuah chhuah dan diktak nibawk chu a sa hmasa hrettu Ngengpuii khan tidanglam lova a sak mai laiin Lalrindiki Khiangte erawh chuan “Dar a zam” a rawn ti thung a, khawnge dik zawk ang tih chungchangah inhnialna a siam ta laih reng a nih kha. “Sar a zam” tih hi a phuahtu in a tira a phuah chhuahdan chu a ni a. “Dar a zam” tih erawh a thian thenkhatte thurawn anga a tihdanglam leh niin a phuahtu ngei hian a sawi a ni.

“Sar zam” hi chhimbal rawng ang mai, chawhnu lam, nizung a awm tawh hnua, ni bula zam kual raih thin a ni a, ni bula sar zam a awm chuan sar thi an awm a ni ngei ang tiin piputen aien nan an lo hman thin a ni a. “Sar zam” tih hi thil awm zen zen ngailo a ni a, a mawi em em mai lehnghal a, “Sar thi” an awm tih entirnaah piputen an lo ngai ngawt na a, “Sar zam” a awm loh pawn “Sar thi” chu an awm thova, thil pawimawh tak mai chu “Sar zam” hi a mawi em em mai thi hi a ni. Vanduaina leh thihna lam entirnan chuan uihawm tak a ni. Thil hmuh tur awm zen zen lo a nih avang leh a mawi em avangin “Sar” a zam tawh chuan miten an hmu duh em em a, an inkawh hmuh sup sup thin a ni. H.C. Lalsanglura’n “A va mak em” tih hla a phuah chhan Jenet Lalnunhluii, tuna Presbyterian kohhran Pastor nupui nita, a pasal rawngbawlna hmun Nepal a awm mek hi, nula hmelchhe lo tak mai, a nungchang that avanga amah hrechiangtu apiangte ngainat rawn, a nungchang mawi tak maiin a tihhmelthat lehzual a ni a, a nungchang belh chian deuh hnua Sangluran a ngaina em em mai leh, a ngaihzual telh telh maite, a thlir ning thei thlawt lo maite chu thilmawi leh awm zen zen lo, mawi dang dai tak, ni sira chhimbal ang maia dangdai taka zam kual raih mai nen a tehkhin hi a dik lohna a awm hranlo.

Kan pipute hunlai khan “Dar” hi a hlu hle thin a, Darbu nei chin ngat te chu khawkhat pa khawsa thei tak leh Lalte an ni tlangpui thin a ni. Sailo lal fanu te man atan Sial leh Dar te a lar hle thin a ni. Rimawi lamah Darbu in hmun a chang thuk hle a, Darbu hla ringawt pawh 20 chuangfe a awm a, Mizoten Music Instrument a neih that ber a ni nghal bawk a, thil hlu sawi nan “Dar” hi an hmang nasa hle thin bawk a, hlathuah pawh an hmang nasa hle thin. “Dar tui luan” tih chu hla thuah nula hmeltha sawi nana hman a nih rualin “Dar zam” tih erawh Pi Hmuaki atanga Lalawithangpa, Lalzova leh Vankhama thlengin an lo hmang ngai hauh lo zawka. Tin, Dar hrim hrim hi thil zam chi a ni lova, amaherawhchu Dar tui erawh chu thil dang cheimawi nan an luan ve bawk thin a ni. Chuvangin “Dar a zam” tih aiin “Sar a zam” tih chu a dik zawk em em a ni.

Voice of Young People winner

Sarah Lalchawimawii  (12yrs) Voice of Young People winner hi a naupan ngaihtuah chuan a zaithiam viau mai a,a lo pian chhoh dan pawh thil ngaihnawm tak leh danglam bik ani a, tunah hian U got talent ah telin a la tling chho ve mek bawk a,talent nei tha tak ni in, hma hun a nei eng hle ni.

CHUAI TA MAW

CHUAI TA MAW

– C.Lalthazuala

Kum 1966 a Mizoram buai chuan a bik takin Mizo thalai-te rilru a khawih bik hle maia, India sorkar awp chin, Zohnahthlak hnam hrang hrangte chenna ram mai bakah Burma rama kan Zohnahthlak hnam hrang hrangte chenna ram bial thlengin a nghawng chhuak hneh hle ani. Burma rama Zohnahthlak hnam hrang hrangte chenna khawpui thenkhat, Falam leh Tiddim-te chu Hnam Sipai pasalthate’n an la ve ta maia, Rihkhawdar erawh an la thei ta biklo. Mizo hnam leh an chenna ramte chu eng sorkar mahin an awp tur anilo, anmahni kea dinga, mahni a ro in rel turin, dikna an neia, an thlahtute atangin eng hnam thuhnuaiah mah an la kun ngailo ani tih ‘au hlapui’ chuan thalaite rilru a hneh tak meuh meuh a ni.

Burma rama khawpui mawi tak leh boruak thengthaw nuam tak, Chin khawpui ber nibawk ‘Falam’ khawpuia laitual leng mek, tleirawl vengva tak mai, music thiam tak, a bik takin, guitar perh lama Falam leh a chhehvela mite hriathlawh tak, Biaklara chu Mizo hnam zalenna tura beihna ‘Independence Movement’ chuan a rilru a luah hneh hle maia, Mizo hnam zalenna turin a pen chhuak ve ta nge nge ani. MNF Underground Group chu a nu leh a pa, a pianpui unau te leh a laitual lenna Falam khawpui mawi tak kalsanin a zawm ve ta a, hetia MNF a zawm ta hi CH Battalion-ah a awm nghe nghe a ni.

MNF sipaite chuan Falam, Tidim khawpuite an han la ve ngial nain, sorkar lian leh training nei tha zawk Burma sipai special force-te chuan reilote chhungin heng MNF ho khaw lak te hi an la let leh vek a, Chin Hills huam chhungah Burma sipaite chu an che hrang ta hle maia, MNF underground ho pawh chu an um tawm hneh hle mai bawk a, Biaklara leh a thiante, Mizo tlangval engemawzat chu Burma sipaite chuan an man ta hlawm a, Mizo tlangval naupang tak tak ‘Pathian Leh Kan Ram Tan’ tia rammu te chu man an han nih tak hnu chuan Burma sipaite chuan an sawp rethei hle mai bawka, an dawpna lamah nasa taka sawisain kut an thlak a, an nghaisa nasa hle ani. Mahse, ‘Pathian Leh Kan Ram Tan’ tia mahni chenna in leh lo leh nu leh pa then leh rualte kalsana rammu tlangval huaisen tak takte chuan nghaisakna chi hrang hrangte chu tuar chhuakin, an thiante tana thil pawithei thuruk engmah an puang duh hauhlo ani. Ram leh hnam tana nunna thap anni miau alawm.

Lemziakthiam, tingtang perhthiam, hlaphuahthiam Biaklara hi kum 1968-ah Burma sipaite’n an man a, Falam lock-up-ah kum khat zet tan tir ani a, Falam lock-up chep em em maia kum khat zet a tan hnuin, Burma ram khawpui lianber dawttu, Mandalay khawpui Central Jail-ah, hmanlai kawl lal ropui, Siampahranga kulh chhungah an dah leh a, chumi hnuah Falam lock-up ah vek sawn chhoh leh ani a, kum khat vel zet Falam lock-up ah hian an tan tir leh ta ani. Kum thum vel zet chu lung in ah a tang anih chu. Ram leh hnam tana a tawrhna ropui tak hi Mizo hnam lehkhabu-ah a chuang reng tawh ang. Awle, Zorimawi Khawvel lam nen, Biaklara thil tawn leh a hringnun zin kawng chu i han sawizawm tan tawh teh ang hmiang.

Biaklara leh a thiante, kawl ho zinga lung in an tan lai hian, tlangval naupang te te an la ni a, an khawhar thin dan tur zia chu kan suangtuah thiam mai awm e. Falam khawpui mawi tak mai, van dumpawl ruih mai leh boruak thiang tak hnuaia zalen leh engthawl tak maia laitual an lenlai nite, thenrual thate nena zankhaw tairek thlenga an zai ho dal dal thin laite, nula rima, inthurual taka, an nula thian ngainat em em te leh an hellai di te, thlamuang taka an rim ho dal dal hunlaite, Mandalay Central Jail chhung atangte chuan an ngaihtuah ve \hin ngei anga, an suangtuah ve fo ngei ang. An lung a leng vawn vawng thin ngei ang le.

Vawikhat chu Biaklara’n lungin a tan pui, a thianpa chuan Biaklara chu thu lungchhiat thlak tak mai a hrilh ta maia. A thianpa chuan, rinawmna thu alo tiampui tawh, runlum nuthai atana, rinawmna thu alo tiampui tawh chuan mak tak maia a phatsan tak mai thu leh, chutianga inphatsanna chuan a rilru a tihnat zia thute, chu hmeichhia a hmangaih em em in lengdang tang a belhsan mai tur leh, kumkhuaa midang ta ani mai tur chu, a ngaingam thlawtlo ani tih thute a hrilh ta a, chu thil chuan Biaklara rilru chu a khawih ve ta hle maia, a \hianpa chu a khawngaih ta ngawih ngawih maia, a thianpa chu amah ah te a han inchan vel a, a thianpa thil tawn chu a hriatthiampui ngawi ngaawih mai ani ber ang chu, he hla ‘Chuai Ta Maw’ tih hla mawi dangdai leh lungrun thlak ngeih ngawih deuh mai hi alo pianchhuah phah ta ani. He hla Hanks William Sr hla “My Son Calls Another Man Daddy” tih hla thluk a hmang a ni.

Ram leh hnam tana rei tak jail tan tawh hnua hmangaih tak te’n lung in tan hlanin mi lo phatsan tih han hriat leh zel mai chu pachang tan pawh rilru mumal neih a har ngawt ang. Tingtang perhthiam, hlaphuahthiam ni bawk, lemziakthiam ni leh zel bawk Biaklara’n a thianpa tana he hla mawi dangdai tak a lo phuah sak hi a ropui ngawt mai. He hla ngaithlatute hi kan vannei tak meuh meuh ani lawm ni? Hringnun  khawvel, kan zinkawngah hian Biaklara thianpa thil tawn ang tawng ve tho, an hmangaih ngawih ngawihte’n an phatsante hi an thahnem  fu maithei ani. Chutiang mite tan chuan hla tha tak ani ngei anga, tin, chutiang boruak tawng ve hauhlo te tan pawh, a thluk leh a hla thu hi a mawi em avang hian hla tha chungchuang a tling ve hrim hrim a, mi zawng zawng, naupang chumchiap atanga pitar putar thlengin hetiang ang hla thluk mawi leh ngaihno bei mawi tihna chang hrelo mihring nih tlat mai chu thil vanduai thlak tak ani ve ngei ang.

Zofate zinga lemziak lama hriat hlawh, tingtang perh leh hlaphuah lama hriathlawh ni bawk Biaklara hi ni 9 April 1948-ah Sazep khuaah lo piangin, se en rual vel anih laiin a pa Chalkhuma Chhakchhuak chuan Burma ram lamah a pem pui ta a, Biaklara nu chu Lalmawii ani. An chhungkua hi Burma rama an pem hnuin Falam khawpui-ah inbengbelin, kum 1965-ah Biaklara hian ‘State School of Fine Arts, Music & Dancing’, Mandalay khawpuiah lemziak a zir a, Zofate zinga lemziahna sikul-a lut hmasa ber anih loh pawhin Mandalay khawpuia lemziahna sikul-ah hi chuan, Zofate zinga han zir hmasa er anih hmel hle mai.

Lemziak zira kum thum zet Mandalay khawpuia a awm hnuin, a thil zir lai chu a han zir zo ta chenga, Zoram zalenna sual turin a rammut a ngai leh ta sia, lung in ah kum thum vel zet hun a khawh ral leh rih hnuah, lung in atanga a chhuah hnua, thil eng eng emaw a tih fel leh zet hnuah Mizoram lamah a rawn chhukthla ta ani. Kum 1973-ah Aizawl-ah rawn chhukthlain, 1974-ah Aizawl-ah hian a inbengel ve ta a ni.

Kum 1974-ah Tualte lal, huaisen hmingthang, Nikuala thlah kal zel, Lianhlira fanu Seni nen an innei a, Seni nen hian fa pali neiin, chhungkua an din ta a. A thianpa Ngursavunga nen ‘Zodi Arts’ dawr an siam dun a, Ngursavunga hian ‘Zodi Watch Repairing’ a siam ve bawka Aizawl Zion Street-ah in inluah tawmin dawr an siam dun thin nghe nghe ani. Aizawla a inbenbel tantirh, a hun hmasa lamah chuan rimawi lipui a liluh thuk ve hle a, tingtang perh lamah pawh 1970 chawhma lamah te kha chuan hriathlawh ber pawl a tling phak ani. Hla phuah thiam Saitluanga(hlalar chuai theilo, ”’Tawnmang Lasi”” phuahtu), radio artist Vanlalhmangaihi, leh Engzuala te nen Beat Group ‘The Flaming Splinters’ din hovin a hunlai na na na chuan an lar thei hle a ni.

Biaklara hian hla 17 vel a phuaha, tuna kan thlurbing bik ‘Chuai Ta Maw’ tih hla hi, Zohnahthlak hnam chitinte zinga a hlaphuah ho rau rau ah pawh tlana deuh ber chu ani mai awm e. He hla hi Lalhlunmawii of Zodi khan lungrun thlak ngeih ngawihin a rawn sa lar anih kha, Lalhlunmawii aw mawi tak avangin he hla hian mi te rilruah bu a khuar nghet ta tlat ani ve thei thova, chuvang tak chuan Lalhlunmawii of Zodi hian fak a phu hliah hliah ani. Lalhlunmawii’n hun rei tak chhung par alo chhuanpui hnuah Zomuanpuii’n tunhnaiah thiam takin a rawn sa thar ve leh a, hla tha na na na chu thantharte’n an sa thar zel anga, hluihlawm ani ngai lovang.

Tahan khawpui atanga rawn piang chhuak, Rimawi thlipui Zofate zinga rawn tleh tirtu, Zodi, Vulmawi, rock group ropui tak tak rawn pian hma khan, Buta of Vulmawi-te, T.Zorampela of Zodi-te nen tualchhunga puipunna hmunahte lo play ho fo tawh thinin, Biaklara hi heng guitarist lar tak tak lo ni ta te lo kaihruai thin tawhtu ani bawk. A hun hmasa lamah Zorimawi hmasawn nan a theihna te lo seng tawh thin mahse, Mizo mipui tam berin amah kan hriat dan ber chu ‘lemziak lam huang’ ani ber awm e. Tunah hian Bethlehem Vengah, B.Lalthlengliana (L) ex-minister, te inluah mekin, Pu Thlnga te chenna hnuai chiahah chhungkuain an cheng mek a, tu mawng a beng ve tawh nghe nghe ani.

Tunah chuan alo upa ve ta, chuvangin, Pu Biaklara, guitarist, artist, hlaphuahthiam, ram leh hnam tana kum thum lai lung in lo tang tawhin a thianpa tana a hla puah sak ‘Chuai Ta Maw’ tih hla lung ti run ngeih ngawih tak mai hian a tawp hi han khar nghe nghe teh  ang aw.

                CHUAI TA MAW

Phuahtu : Biaklara

Satu      : Lalhlunmawii (Zodi), Zomuanpuii

Mahten awmkhawhar runthim hnuaiah

Lunglai di ngaiin ka lo vai

Kum sul vei se tawnni her ang maw?

Duhlai Mampuii khiangawi hnu

Hmanah chuan sirva ianga lengin

Duhten ka tawnah vulzai relin

Tawnloh karah lung i her mai hi

Ka tawnah aw di i chuai ta maw

Lenna run hmun lo a pawi ber,

Thaikawi maia biahthu hlan zawng;

Mi u lunglai der thiam mai vanga,

Lung min hersan hi a na e

Bawihte nang nena Pathian samsuih

A rem lo’m ni kumtluang atan

|hen loh thudi kan tiam rem sa,

Dairial iang an chang zo ta maw?

KA NUAM VE E

KA NUAM VE E

                C. LALTHAZUALA.

Zofate zing a, guiterist ropui, lemziak thiam lar ni bawk, tuipui ral sap hote’n, sakhaw thar an rawn ken luh ruala, Mizorama an rawn ken luh tel, tuipui ral rimawiin Zofate min chim ve tak hnu a, Zo hnahthlak hnam chitin te rilru nghawr nghing khawpa perhkhuang Țingțang lama, hnam pum hriat hlawh, Zorimawi chanchina chhinchhiah reng tawh tur, Pu Lalbuta, Buta tia kan hriat lar zawk, hla phuah ‘Ka nuam ve e’ tih hla zet hi chu tehfung chi hrang hranga han teh a, han zir chian lehzual hian, hla țha chungchuang a nihna hi kan hre chho telh telh dawn anih hi.

He hla Zofate’n kan lo hriatna bul chu rock band ropui ‘Vulmawi’ audio album hmasa ber ‘Raldawna leh Tumchhingi’ tih album-ah khan a ni awm e. Kha album khan a hun lai na na na chuan Zo hnahthlak hnam hrang hrang, a bik takin India ram state hrang hrang, Mizoram, Manipur, Meghalaya leh Tripura State vela zo hnanthlak hnam hrang hrang chenna bialte a nghawr chhuak hneh hle a nih kha.

Khatih hunlai khan music instruments lamah Mizoram chu kan la hniam hle a, Aizawl leh Lunglei khawpuiahte chuan rimawi hmanraw bikimin beat group țhenkhatte chuan mipui hmaah han inlan vețhin bawk mahse, sap hla sak an uar em em a, Aizawl leh Lunglei khawpui ațanga lo zi chhuak, zo hnahthlak hnam chitin nghawr nghing thei beat group an awm lo reng reng a, chutih lai tak a, Tahan khawpui, Burma rama zo hnahthlakte khawpui lian ber ațanga beat group ropui, ‘Zodi’ leh ‘Vulmawi’ te’n, Mizo hla ngei, western music changkang tak nena rem leh cheimawi ngat an rawn vawrh chhuak ta mai kha chuan Zofate hi khawvel rimawiah bungthar min kaipui dawrh a ni ber a, Zofate rilruah Țingțang perh te, Drums han khawn te, sap ho ang maiin kan lo thiam ve thei a ni tih hi an tuh tel nghal a, Mizo hnam rilruah rimawi khawvel han liluh tak tak tura huaisenna leh inrintawkna min rawn siam sak nghal bawk a ni.

Beethoven-a te hunlai ațang daih tawh khan, instrumental music a ni emaw, hla thlûk a ni emaw, zai thiam hla sak leh a remna rimawi reng reng te hi, a țhat leh țhat loh tehfung lar ber pakhat chu, a thluk kal dan phung ‘melody’ țhat leh țhat loh chungchang leh a mawi leh mawi loh chungchang hi a ni ber reng a, khawvel huap pawha hla țha leh lar reh thei lo ho reng reng hi hla thluk mawi leh țha ‘melody’ nei țha tak an hi tlangpui țhin a ni.

Aw le, Pu Buta hla phuah, ‘Ka nuam ve e’ tih hla pawh hi, Zofate Kristian kan nih vek hnu, ‘Western music’ hmanga kan lunglennate kan in awihtlei ve tak hnu, western music bulțhuta hmanga kan hla te kan phuah ve tak hnua Mizo hla chhuak zingah chuan hla thlûk mawi leh changkang ‘melody’ fuh ber pawl a ni ngei ang.

A hla thu hrim hrim hi a thuk a, a ril a, philosophy thuk tak inphum ru tlat hla mawi leh fuh em em a ni tlat a, a flow leh a tunlai țawng takin a ‘rhymth meter’ thlengin kan ti dawn nge, a hla thu mal tin intuah rem dan hi a fuh em em mai a, hla thu mal intuah rem fuh chuan hla tlar tin in rem chhoh danah awmze thuk tak a neih tir a, chutak chuan sak a ti nuam a, a ti hla bik ta hliah hliah mai a ni.

Vulmawi audio album ‘Raldawna leh Tumchhingi’ album-ah khan Pu Buta ngei hian a sa a, a phuatu ngeiin a sak chu a lo ngaithlatute bengah leh thinlungah a thawh dan a dang daih a nia.

Rock band ropui ‘Vulmawi’ audio album ‘Raldawna leh Tumchhingi’ tih album, ‘Ka nuam ve e’ tih hla telve na album hlawhtling zet mai kha Burma ram khawpui ber dawttu, an second capital khawpui mawi leh upa tawh tak, ‘Mandalay’ khawpuia ‘MINTHANT’ recording studio-a record a ni a, 1976 kuma record niin hemi kum vek hian tlangzarh nghal a ni a, MINTHANT tih hi recording studio neitu hming a ni a, a neitu MINTHANT-A hming chawia din recording studio tihna a ni.

‘Ka nuam ve e’ tih hla dangdai bikna riau chu, Mizo hla phuah thiam lar dangte’n hla thua an hman ve ngai mang loh hla thu mawi leh dangdai bik a awm nual mai hi a ni awm e. ‘Hlimsa lengrualte’n nui hiau sam an chai e,’ tih lai tlar taka ‘Sam an chai e’ han tih lai tak te, ‘Lentu chhawl hnawm ram daiah’ han tih lai tak te, ‘Tlangsam par sir siar’ han tih lai takte mawlh mai hi ngaithla liam mai mai lo vin i han chhut chiang lehzual teh ang u khai.

He hla kher hi chu Mizoram University, Mizo Department-a University zirlaite zirbua telh tlak a va ni em. Pu Buta’n a sawi dan chuan, “Kan tleirawl laiin rual u te zan riaka ram chhuak hi kan zui ve țhin a, riah buk nghak, ei rawng lo bawltuah min hmang ve țhin a, Chhura rual lai ngaw durpui hnuaia țhang hmun pe hen hun maite chu rual u zawkte a chhan ka han zawh chang chuan, ‘ramsa te sam chaina anih hi’ an ti leh mai țhin a, chu chu ramsa te hlim taka tual an lenna, an infiam velna hnu hma tiin min hrilhfiah bawk țhin a, chu chu ka hla thuah hian ka seng lut ta a ni,” tiin a sawi.

Tin, ngaw durpui hnuaia kal țhin tawhte chuan, ‘Lentu chhawl hnawm ram dai’ tih lai takte hi hriat thiam theih nghal mai anih bakah mit thlain kan ram lo vah tawhna emaw kan lo kal tawhnate emaw min hmuh let tir uai uai țhin ngei ang.

‘Radawna leh Tumchhingi’ audio album an siam dawn lai vel khan Pu Buta leh Lalruanga, Vulmawi zaitu pui ber chu Mandalay khawpuia kohhran quarter tereuhte ah an awm dun a, recording studio sum sen tur țul zatte an han hriat chian hnu chuan, Falam khawpui lama chhungte hnena pawisa han dil kual vel turin Lalruanga chuan Pu Buta chu a hawsan leh ta rih a, hetih lai hian Pu Buta te leh Lalruanga te hi Falam khawpuiah an la awm a ni.

Kohhran quarter, hmun thengthaw nuam tak, thingbuk mawi tak takin a hual vel, thingbuk kara, ngun taka enkawl, pangpar chi hrang hrang par vul chuk mai te, sava chi hrang hrang thlawk phar phar maite leh an hram vel noh noh maite chuan Pu Buta lunglenna chu a kai tho kan ti dawn nge, chu’ng a chhehvel thilte chuan Pu Buta chu lungleng takin a siam kan ti dawn, a țhianpa Lalruanga lah chuan thla khat vel lai thang turin Falam khawpui lamah a hawsan rih bawk si.

Pu Buta chuan a chenna in tereuhte chheh vela, Pathian thilsiam, tlangtin mualtin thingtin par zawng te, va tinreng kawplai Di nena lenlai chente a han thlir kual vel chuan a rilru chu a kalding ta hle mai a, a thil thlir lai, nungchate nun chu a awt ta tlat mai a, siamtu ruat ang a, lungawi tak leh thlamuang leh hlim tak mai a, an awm thei bikte, chantawka an lungawi hliah hliah mai bik te, mihringte anga hmasawn tum reng renga an phili buai ve miah lo te chu a awtin chutiang taka nun nuam leh hlimawm leh hahdam thlak chu hringnun hi ni ve thei se a ti rilru ta em em mai a, thingtin parte, an awmdan tur leh an nihdan phung tura Pathian rorel sak dante chu a awt rilru ta em em a, hmatiang sawn tum reng renga mihring nun hahthlak leh hmanhlel chu hrehawm a ti ru thut ni ngei tur a ni, he hla mawi tak mai ‘Ka nuam ve e’ tih hi a phuah chhuak ta hlawl mai a ni.

Mizo hmeichhe zaithiam, hla phuahtu ropui Vankhama fanu, Mizo hmeichhiaah chuan pianphungah pawh a hleitling ber pawl tling phak, pian chhuah pui sakhmelah pawh mipui chunglam, 1st January 1955 kuma khawvel eng rawn hmu a, 7th May 2010-a boral ta, Vanlalruati khan 1978-ah ‘Ka nuam ve e’ tih hla hi All India Radio, Aizawl Station-ah a thun a, Guiterist ropui leh he hla phuahtu Pu Buta’n perhkhuang a han perhsak nghe nghe a ni.

Mipa aw leh hmeichhe aw mawi dan chu in ang hek lo le, hetih hunlai taka radio artist lar leh huhang ngah ber pawl Vanlalruati’n a han sak meuh chuan a lo lar nasa lehzualin, a lar dan pawh a nghet lehzual ta sauh tiin sawi ila a dik khawp ang.

Kum 1985-ah Vanlalruati vek hian United State-ah, A u Vanhlupuii nen zuk kalin Rock Ville, Washington khawpuia, an țhianpa musician leh recording studio neitu Christopher Biondo-a recording studio-ah audio album an zuk buatsaih dun a, thla hnih chhung zet hun an zu hmang nghe nghe a ni. Pi Vanhlupuii pawhin ‘I hun ti thianghlim la’ tih audio album a zuk puitlin ve bawk a ni.

Recording studio-a sessional musician-te meuh pawhin he hla thlûk hi chu mawi an tiin rimawi han rem vel te pawh nuam an tih hle thu Pi Vanhlupuii chuan a sawi a, an țhianpa, recording studio neitu, Christopher Biondo-a phei chuan, a hla thu sapțawnga lehlin a, zaithiam lar Tina Turner te hnena zawrh a rawt hial thu sawiin Pi Vanhlupuii chuan chutiang tihlawhtling tura hun an neih tam tawk loh thu a sawi lang tel bawk.

Hringnun hi a hahthlak zawnga chhut chuan thawpik thlak tak hi a ni ve reng a, rual el reng renga kan khawsak dan te, hmasawn tum reng renga kan hmanhlel maite hian hahchawl thei lo vin min siam a, siamtu Pathianin a tir ațanga a ruat ang a, phun nawi hauh lo va tun thlenga mihringte kianga cheng chho ve reng nungchate nundan phung nuam tak mai hi chu an thikawm țhin khawp mai. Aw le, a hmawr bawk nan Buta hla ropui ‘Ka nuam ve e’ tih hla chu i han hmang nghe nghe teh ang.

Phuahtu: Lalbuta

Satu: Vanlalruati, Daduhi, T Melody