TLAITLA ENGMAWI
-C.Lalthazuala
Kum 1973 thal favang boruak nuam tak mai a her liam a, thlasik khawvawt ver vawr tak mai chuan Aizawl khawpui boruak nuam tawk tak mai chu christmas lo thleng mai tur chuan a ti nuam telh telh emaw tih mai tur a ni a. Sikul naupangte lah chuan kum tawp exam an lo zo ve tawh bawk nen, Aizawl khawpui boruak leng vel chu a thawven thlakin a zangkhai a, chu achhapah khawpui chheh vel, Zawlkhawpui hual veltu tlangdung mawi tak takte chu, romei zam velte chuan anti zing chiai mai bawk a, lungleng mite tan chuan khawtlang lunglen vanga kur ruk kur ruk hun lai tak hi a ni ngei ang le..!
Chutianga boruak in thlak thleng lai tak in a a ken tel ve thin chu “Tlang hrileng” chikhat “Hritlang khawsik” kan tih mai thin hi a ni a. Heng tlang hrilengte hi an sarhu lai chuan khum beta mutpui tham an ni ve hial a, natna dang nena in kaihhnawih lem lo a nih hrim hrim chuan kar hnihkhat hnuah a dam ve leh tlangpui bawk.
Hetiang boruak inthlakthleng mek lai hian Aizawl khawpui huam chhunga hmun thengthaw nuam lai leh boruak thiang nuam lai ber Aizawl Chaltlang vengah chuan tlangval kum 20 chuang awrh, Zoram dung leh vanga hming hriat hlawh, All India Radio, Aizawl station kaltlanga a aw mawi dangdai leh pa hliah hliah mai avanga mite’n a hmel an hmuh chak em em C.Lalrinmawia chu hritlang khawsik vangin pawn pawh chhuak thei lovin khum betin a lo awm ve mek bawk a.
Tlang hrileng ah na na na, tlangval chak vanglai tan khum beta rei tak awm theih hek lo le, C.Lalrinmawia pawh kar hnihkhat vel chu a zalna laikhumah pawn chhuak thei lovin a han mu ve tlen tlawn na a, kar lovah ngai awh leh thuaiin, a rawn tho harh leh ta thuai a. Amaherawh chu, a hritlang dam kawr vel avang chuan a chenna in leh thenawm hnai vai te te bak chu lam hla deuh leh veng hla deuh zawkte chu a la kal thei bik lova. Chutia pawn pawh chhuak mang lova a awm lai chuan, Zawlkhawpui boruak leh sik leh sa inthlakthleng mek chuan khawpui leh a chhehvel boruak lan dan thlak thlengin khawvel mawi na thar, chi hrang hrang bakah nung cha hram thiam, chitin sik leh sa inthlakthleng a zir zela hram dan chi hrang hrang, mawi em em mai rawn vawrh chhuaka, zai vawr noh noh maite chuan zai mi lungleng, C.Lalrinmawia chu a ti lungleng ve ngei ang le.
Pawn chhuak vak lova a tap tawm reng lai chuan tlai khat chu an in chheh velah chuan hawi khawthawn vel pahin muangchang hian a vak rak rak a, tlai ni tla tur chuan Chaltlang veng leh a chheh vel ram chu a en vel ruih mai a. Hmar lamah Dungtlang ram leh a chheh vel kham chhawrdawh mawi tak tak te, khawthlang lamah Rangvamual leh Mau mual ruam te, kawr dung thuk tak tak Sairang phai lam a, in khawhthla in, Tlawng Lui a finna ram rai cham duai leh, Lengpui phaikuam lo daidangtu chhim leh hmar zawnga tlang dung in pharh phei vel et ut mai te leh a ti lunglen thlak leh zual tura romeiin a bawm vel chiai mai te, chumai a la nilo, chung lama van rang chhum, zaidam hmel taka leng vel delh delh te chuan C.Lalrinmawia chu suangtuahna khawvelah achen tir lo thei lo.
Chu ni tlai tak chu chawlhni tlai ani nghe nghe a, kohhran inkhawm leh thalai programme te an zawh fel fai hnu tlai ni tla tur thlang kawlrawna a her liam hma si, Chaltlang veng thengthaw nuam tak mai, a awn zawnga tlai ni tlain a chhun eng phut mai chu a mawi dan a dangdai hle a, a detin a de sur mai a ni ber. Tlai ni tla tur chuan Tanhril tlang chung atang chuan a eng mawi tak mai chu induh hauhlo leh Zawlkhawpuia chengte chu tumah thliar bik nei lovin a her liam hma, hun reilote la awm ah chuan, a eng mawi tak mai kal tlangin duhsakna a rawn hlan mawlh mawlh mai bawk a. Chanmari atanga Chaltlang veng pan chhohna kawngpui sir tawn, a chung lam leh hnuai lama thinghnah nem bela, hramthiam va tin zai vawr ri te chuan tlai ni tla tur hnuaia khawvel mawina chua an belhchhah nasa nangiang mai bawk.
Nungchate leh hramthiam va te chauh chu, tlai ni tla tur “Engmawi” lawma zai vawr vel an ni bik lova, C.Lalrinmawia te chenna in sira Chaltlang Field-ah chuan naupangte chu hlim takin an infiam a. Tin, nula leh tlangvalte pawh chuan naupang infiam vel thlir pahin field kotlang phul chung velah te chuan thuthmun an rem bawk a. Tlai ni tla tur eng mawi lawma Chaltlang khelmual zawl leh a chheh vel phul hmun rem leh kawtthler vela lengte chu in pawh tawn em em a infiam tawn chung zelin an in sul pel zut zut mai bawk a. Nula tlangval ngam tlak taka in chhai vel leh in au vel thawm chuan nula aw rawl ri leh aw rawl tawp a nui ri awr awr te chu a ken tel a ni a. Tlai ni eng her liam mai tur thlah nan chuan thil awm leh inhmeh tak pawh a ni ve reng reng e.
Chaltlang field chhunga naupang ho infiam lah chu an te teng tung mai a, a then an in um kawi zawr zawr a, a then an in ball vawm bawk a, a thenin football an pet bawk a, a then an in tlansiak mek bawk a, a tu a te mah chu inti buai lovin an thil tih theuhah chuan an hlim tlang a ni ber mai.
Nula tlangval hlim em em a leng ho dal dal te chuan Chaltlang laitual an mawi a, kum upa deuh tawhte chuan varanda atang leh tukverh in hawng hiau mai atangte chuan, chung hlim taka laitual leng mekte avang chuan an lung a leng thara, nunhlui liam hnu, an thatlai hunte hrechhuak tharin an lungleng thar deuh nge ni, nunhlui liamhnu kohkir theih tawh siloh ngai hmel takin an lo thlir hlawm bawk a. Ni lah chu a her liam ruai a ni tawh mai, Tanhril tlang chungah chuan suk chen bak a awm tawh lo. Zawlkhawpui chhuah lam vengte phei chuan ni eng an hmuhlohna a rei tawh a, Chaltlang veng hi zawlkhawpui chhung rau rau ah pawh a hmun sang lai ber pawlanih avangin, tlai ni tla tur, ni zung awm tawhin, a tleu zawnga leilung a han chhun mawi dan danglam leh dangdai tak hi ahmu rei mai mai zawk a nia. Ni lah chuan a eng mawi tak chu a herliam pui hnai telh telh a, a mawi dan a danglam tulh tulh mai bawk si. Mi lungleng mi tan chuan hetih hun lai taka turnipui her liam turin a, khawvel mawina atih belhchhah mek hi thlir loha her liam tir phal chi a ni lo. Chhun roreltu tura khuanun a ruat turnipui chuan Zofate in pui ber Zawlkhawpui chu mangtha ti chung zelin zamual a liam san ta. Chaltlang field leh kawtthler hu lum lai nula tlangval leh naupang hlim taka laitual mawitute pawh chu an lawina run belin an tin zo ta.
Chu chawlhni tlaia Chaltlang field veng leh a chheh vela nula tlangval khawsa zia leh naupang tualchai vel lo thlir rengtu C.Lalrinmawia rilru chu suangtuahna khawvelah a cheng a, nunhlui liam hnu a ngaihtuah let tir a, naupang tualchai rual nih atang kum 20 ral a kai thlenga a hun hman chhoh dante a dawn kir tir a, khawvel leh a chhunga thilsiam chi hrang hrang mawina ngaina tu leh hlut em em tu a lo ni bawk nen, he chawlhni tlaia tlaini engmawi danglam tak hian “Mizoram nghawrnghing dawt thei hla” “Tlaitla engmawi” tih hla chu a rawn phuahchhuah tir ta a ni. “Aw ka thlir vel tlaitla engmawi, awilo mawi chuang mange, sakhmel thar hrailengte’n lo lawm” tiin, a chang hmasa ber tlar thum chu a han chhawpchhuak a, hla thu ril teh ngun lo, a ruk taka rilru leh thinlung chhun deuh ngaih, ngaihno bei ru tak bawk si thu hmangin he chawlhni tlaia an mahni chhungkaw chenna veng Chaltlang field venga boruak hlimawm leh a lung ti leng em em chu tawi fel tak leh thiam takin a sawi chhuak chiang hle a ni.
Assam state hnuaia District pakhat ang lek a Mizoram a awm ve lai kha chuan Guwahati – Shillong Radio Station-ah khan zaofate hian minute reilote chhung programme an nei ve thin a, chu hun reilote chhung chu mizo hnahthlak hnam chitin, Mizoram chhung leh pawn a chengte’n an hlut thin hle a, amawherawhchu Mizoram dung leh vangah Radio a la tlem em em a, khaw tam takah Radio ngaihthlak tur annei heklo. A bik takin rambuai hnuah Mizoram hmun tin mai chu daidar a lo ni ta a. A hreawm laiin hreawm teh mahse rambuai chu Mizo mipuite tan kawng tin renga khaweng min hmuh tirtu a lo ni ta a. Mizo thalai tam takin, thlang kawrvai ramah lehkhate zirin an chheh vel ram an daidar nasa ta hle a. Chutih rualin India sorkar lahin Mizo mipui rilru hmin tum ranin hma nasa takin a lo la ve reng bawk nen. Ram buai atanga reiloteah Aizawl khawpui – Tuikhuahtlangah ngei Radio Station Mizoram-in kan lo nei ve ta bawk a, All India Radio Aizawl hian music leh culture a hmasawnna chu a zuanin a zuan tir ta a ni.
1970 hnu lamah phei chuan Mizoram khaw tinah Radio ngaihthlak tur a lo awm ve ta a. Tin, Radio mai nilovin record player te pawhin Zoram khawtin deuhthaw achiahpiah ve ta a. Sap zaithiam lar ho zai rimawi thlengin zofate’n an lo tuipui chho tan ve ta. YMA in puipun – inkhawm a buatsaihna reng rengah
Clear Water Revival (CCR) ho hla cotton field mi pakhat talin a sak loh chuan mipuite kalkhawm lunglawm a kim thei ta lo.
1972 ah Mizo District tih thin chu “Union Territory” dinhmuna hlankai niin, mahni a rorelna hrang neiin a lo awm chho ta bawk nen, hetianga hmasawnna rahbi thar chak taka lo thleng chho zung zung hian kan Politician-te ngaihtuah tel ve miahloh leh an ngaihtuah phak ve hauh loh rimawi khawvel lama hmasawnna chu mi thahnem nagi leh talent nei tha bik ten an kal chhoh pui ve reng zel a.
Mizo zirlai tam tak, India ram khawpui hrang hranga lehkha zira awmte leh, Mizo thalai sipaia tang, India ram state harng hranga hnam chi tin chi tang, culture in anglo tak tak daidarhtute chuan ram danga an thil hriat leh hmuhte an thiamnate chu Mizoramah rawn seng lutin ngaihdan thar leh khawthlir zau zawk mizo mipuite leh a bik takin mizo thalaite zingah an pe a. Heng thilte hian mipui vantlang nunphung piah lamah rimawi khawvel lama zofate hmasawnna rahbi thar a siam sak bakah chak taka hmasawn chho zel turin kawngka a hawn sak bawk a ni. District Council hun laia zofate radio – programme neih ve chhun, Guwahati – Shillong atanga tihchhuah thin khan Mizoram dung leh vang hi a chiah hneh thin hle a. Amaherawhchu, a rei loh bakah a phuisuilo em em a. Mizoram atangin a fiah tha tawklo em em a. Chuti chung chuan hetih hun laia Radio Artist lo zuk ni phak ngat Laikunga te, B.Thanmawia te, Malsawm Colney-a (Mizo pa lar) leh a pawlte an tih hote kha a hunlai chuan lar vet vet tak an nia. Hetih hun laia artist lo zuk ni phak hi an tam tham lemloh avangin zoram dung leh vangah hriat an hlawh hle a ni.
Kum 1970 atangin Tuikhuahtlang atangin ram leilung fate’n, keimahni puala duan Radio programme kan lo nei ta a. Mizoram buai hma Shillong – Guwahati programme tawite kal tlanga mizo radio artist lo ni tawh thinte boruak ken kha a hun laiah na na na chuan a len teh reng nen, ram changkanna leh khawvel dang kan daidar ve tawhna leh khawthlang lam nun zia leh rimawite’n min rawn chiah ve ta mek bawk nen, ram buai hma a mizo mipuite nun dan phung leh ram buai hnu, a bik takin 1972 hnu lam chu a in ang talo hrim hrim bawk nen. A bik takin mizo thalaite zingah ram buai hma hlathluk ngainat zawng leh ram buai hnua hlathluk ngainat zawngte alo danglam chho ta a, ram buai hmaa tingtang perh duh dan leh ram buai hnuaa tingtang perh duh dan te a lo danglam chho ta a, ram buai hmaa zofate’n an hmuh phak ngailoh electric guiter tha zawkte chu Mizoram-ah lak luh a lo niin, mipui nawl puiin kan lo hmelhriat chho ta zel bawk a.
Mizoram hmun tin rengah record player te alo darhsarh ve takna chuan, mizo thalaite chu rimawi khawvel lamah tih en (enlighten) in a awm tir a. Hla thluk mawi leh music mawi, “melody” fuh leh tha te a hriatchhuah tir thar zel a. Mahse, bengin a hriat ngawt na chu hla thluk mawi leh tha phuah tura theihna leh thiamna petu a ni silo. Hla thluk mawi leh hla thu tha siam thei tur chuan mi bik, talent nei tha nih a ngai si. Hetih hun lai tak hi rimawi khawvel huang bikah chuan thil inthlakthleng mek (trasitional period) a ni a, Rimawikhawvel boruakah khawvel tukverh a dak pha ve tawh si, sap hla ringawt nagithlain western music-in an rilru leh ngaihtuahna te a chim ral mai dawn em ni?
E… nilove. Chu tak chu a lawm 1970 hnu lama kan mizo radio artist te fakawmna em em na chu, All India Radio Aizawl kal tlangin, mizo mipuite hnenah rimawi kal dan phung tharte, hla thluk kal dan phung tharte, zai dan kalphung tharte, tingtang perh dan kal phung tharte min hlui a, rimawi khawvela mizo thalaite tuihalna chu tihreh sakin “Zo romawi” ruai chu kan theh ta dur dur mai a nih hi, tun thleng hian All India Radio artist ngaihsanna hrim hrim a lo awmsa reng tawh nen, rimawi bawl hlo chi dang kan ti dawn nge, chi thar hmangin “Zo rimawi” ramri an rawn zauhva, mizo thalaite tuihalna an rawn ti reh a. Ram buai hma lama, Guwahati – Shillong radio-a radio artiste boruak let engemaw zatin he hun thar a, All India Radio artist ho boruak ken tel hi a lian chho ta a ni.
1970 hnu lama radio artist ten Mizoram dung leh vang mai bakah, zo-hnahthlak hnam hrang hrangte an thu leh hla, rimawi hmanga min phuarkhawm dan hi zofate tan thil ropui a ni a, zah a phu a, chawimawi aphu hliah hliah a ni. He kan lem channa khawvela lem chang thiam kan mizo Politician hlemhle fe fe te ai chuan kan zaithiam hovin a an thu leh hla hmanga mizo hnahthlak hnam hrang hrang, zoram chhung leh pawn lama chengte in unauna leh in zawmkhawmna an siam nasat zia hi zofate hian kan hre chiang telh telh ang a, hetiang lama mi tangkai annihna te mizo hnam chanchinah hian achuang tlat tawh dawn a ni.
Lal huaisen leh rorel thiam, kan zo sap missionary te pawh mizo tawng “A AW B” siam hun laia thahnem ngai taka lo pui bawmtu, Chaltlang Lal Thanphunga chuan Sailala ahring a, Sailala hi Chaltlang Lal hnuhnung ber a ni a. Sailala hi Thanglianchhunga U chiah a ni a. Thangphunga fapa naupang zawk Thanglianchhunga hi sipaiah tangin a pension hnu ah Deputy Commissioner Office Aizawl-ah a thawk leh a, a nupui Lalthanchhungi nen fa 6 hringin mipa 3 leh hmeichhia 3 annei a. Chung an fate zinga a mi lai tak chu zaithiam hmingthang hla phuahthiam hmingthang ni bawk C.Lalrinmawia chu a lo ni ta a ni.
Zorimawi khawvel chanchin emaw, C.Lalrinmawia chanchin bik emaw pawh lothlur dawn ta ila, Chaltlang Lal hnuhnung ber Sailala fapa C.Lalramliana (Parama) chanchin hi sawi hmaih chi a nilo, hringtu pate unau pianghmun annih mai bakah in thenawm chiah anlo ni bawk a, tette atanga inkawm chhoin C.Lalramliana hi talent nei tha leh hla phuah lamah ngat phei chu mi bik tak a lo ni a, C.Lalrinmawia a rawn lar chhuah tirh phat atanga, audio – album hlawhtling tak tak a rawn tlangzarh chhoh lai vel thleng khan, Concertnaah ani e maw, Recording Studio chhungah ani emaw, All India Radio Aizawl hla thunnaah a ni emaw, Aserh zinga amei ang hial a sawi theih turin a tawiawm tlat thin a ni.
C. Lalramliana (Pa Rama) hian a unaupa hi hla tha tak tak, a ma irawm chhuak ngei hmangin a chei mawi hle a ni. C. Lalrinawma hla lar reh theilo, ‘D’ chambawihpui, Tumtawk leng an piang silo, Ka Thai Nute, tih hla te hi Pa Rama phuah vek a ni a, ‘D” chambawihpui tih hla ngat phei hi chu Mi zawng zawng hriat hlawh hla a ni chhun zawm reng ang.
“Tlaitla engmawi” tih hla hi hla pangai anga miten min chhiar sak ve zingah chuan ka phuah hmasak ber a nia, tleirawlte kan la ni bawk nen, hla han phuah ve turin mahni inrintawkna ka la nei tawk lova, a zahthlak zawngte pawhin rilru ah a thawk hlauh zawk a, chuvang chuan kum engemaw zat chu pholan lohin ka up bo vang vang nghe nghe a, kum 1973-a phuah ka ni na a, 1975 kum bul lamah mipui hmaah ka sa chhuak tan chauh a ni tiin he hla phuahtu hian a sawi chhuak tlat.
Mipui hma a a sak chhuah hnu reilote ah All India Radio, Aizawl Station-ah record a ni a, he hla an han record tum hian 1970 chho a, All India Radio Aizawl kal tlanga zaithiam, Radio artist lar tak tak, Zo rimawi lipui a, C.Lalrinmawia’n a liluh pui, a sangawi zawnpui Zira Hnamte, F.Lalnunfima te pawh han pui bawm tute zinga mi anni a, hla phuah thiam Parama pawh a tiel ve bawk.
Radio-a an thun hnu reilote ah Zoram dung leh vang a deng chhuak nghala. Hla lenglawng, hla pawisawilo anih avangin naupang chunchiap atanga pitar putar thleng a sak theih chi leh kohhran rawngbawltute tan pawh han sak ve mai inthlahrunna tur awm lo hla a ni a. A thluk hrim hrim hi a mawl in a tluangtlam em em a, zai mi vak lo tan pawh tui taka sak theih chi, thluk tluangtlam viau nisi, changkang ru tlat, zai lama rual pawl vaklo tan pawh tui taka sak theih a nih thu kan sawi rual rualin, zaithiam leh mipui nawlpui chung lama aw nei mawi bikte tan hlei hlei sak nalh theih tur tak a ni ru tlat mai. He hla hian thluk mawi dangdai tak mai a nei a ni tih hi thudik dik tak a ni.
A Audio – Album chhuak tawh a lar chhunzawm mar rei ber pawl “Di Chambawihpui” tih albumah khan he hla hi telh ve a ni a, he album hi C.Lalrinmawia audio album pahnihna a ni. A audio album pathumna “Nunhlui” tih albumah khan telh veleh a ni bawk a. He albumah hian mizo hmeichhe zaithiam zinga hla lar ngah ber pawl Zosangliani’n puibawmin, a thunawn laiah “Second part” a lo pek sak bawk nen a mawi dan a dangdai hle a ni.
Hla tha leh thluk mawi bikte ti mawi belhchhah leh zualtu chu a remna rimawi tuahrem dan leh remkhawm vel dan hi a ni chiang khawp mai. Chutiang rilru pu ran chunga han ngaihthlak vel hi chuan, “Di Chambawihpui” tih album a mi baka remna fuh chungchuang kha a awm thei lovang. Kha album a mi zet kha chu a fuh kim chang vel vek mai. Chu achhapah kha tih laia recording studio lar tak Auto recording studio-a an hmanraw neih ngaihtuah te chuan a recording quality kha zahpuiawm bik lo tak a ni.
Chaltlang Lal thlah kal zel an nihna chuan eiawnna leh in leh lo ngelnghet neih thu ah te, nitin khawsak nunphung hrim hrim thu ah dinhmun chhe lo leh vantlang chunglam boruak hip thei turin kawng a lo sial sak ve bawk a, hei hian rimawi khawvel lipui a liluh thei tak tak turin an tette lai atangin a lo buatsaih sa reng tawh tiin sawi ta i la, kan sawi sualin a rinawm lemlo.
Chaltlang vengah chuan radio nei hmasa ber nia sawi an ni a, pa ho te pawhin a n in khat thupin an ngaithla thin niin an sawi. Mizoram-in hma arawn sawn chho zel a record player pawh a nei hmasa ber pawl an rawn ni chho leh a. Chutiang boruak chuan an naupan tet lai tanga a uap tlat avangin naupang chumchiap annih lai atanga sap hla thluk ngaithla nasa an ni a. Tingtang nise naupan lai atanga perh tur nei an lo ni leh zel bawk nen, hla phuah mai piah lamah, a bik takin hla thluk siam lamah a unaupa-Parama nen hian an thuk dun hle mai a. Hei hi achhan bul pui ber chu an rawn zik chhuahna chhungkua leh an seilenna chhungkaw boruak hian “Zo rimawi khawvel” a hming chher turin kawng a lo sial sak tawh reng a ni ber ang.
Zo rimawi khawvvela hriat hlawh reng tawh tura hming an rawn chher tan tirh te hian Rock Group thiantha zualte nen din hoin a hmingah “Virthli leng” an ti a, “Virthli leng” ah hian C.Lalrinmawia leh Hmingtea (Sun set view) Chanmari veng chu an zai puipu chu pahnih an ni a, member dangte chu, To-a, Dinga, (Bassist) Puia(late) khuangpu, Valzotea (Hlaphuah thiam) te anni. Virthli leng group ah hian veng hrang hranga a thiam tha leh rimawi khawvel a a dawi sa kilpui te nen an thawk ho ta a. Hetia thiantha te nena an thawh hona hian Chaltlang veng piah lama Zawlkhawpui boruak han al leh zual turin ko ri a tu hle a ni awm e.
Khawvel hmasawnna zuang dawr dawr mai chuan Mizoram pawh kawng tin rengin a ti danglam chak hle ami. Tun kum zabi tharah phei chuan thangtharten khawvel pang leh lam chanchin Television leh Internet kaltlangin an hre ta zung zung bawk si a. New York khawpui leh London khawpui a zaithiam lar ber berte chu chawp leh chilhin Aizawl khawpui leh Mizoram dung leh vanga milar an lo ni ve nghal ta mai anih hi. Kan thalai ten hla thluk siam danah leh rimawi kalphung hrang hrangah za ah za in khawthlang kalphung an entawn a ni ber mai. Hnam tin hi kan hnam zia leh sakhuate, kan rimawi ngainat zawng lunglenna thlengin kan chenna ram leilung leh ram hmulte, sik leh sa in her vel dan te hian a nghawng thuk hle a, Hnam tin hnam ziarang pawh a in anglo reng a ni.
Phaizawla pianga seilian, tlangram mawina pawh hmu velo te leh, tlangram mawi taka pianga seilian, ngaw dur pui pui leh romei zam chiai mai te, sava chi hrang hrang, hram mawi tak tak ngaithla fo te lung lenna a in ang thei dawn lova, a in ang ngai bawk hek lovang. Chutah tak chuan tunlaia kan thalaite’n thil an thlir thelh palh leh tlat thin.
Local cable Network-ZONET-ah leh LPS-ah te rock band tha tak tak music video kan ngaithlain kan hmu reng reng a. Amaherawhchu mizo culture leh kan lunglen zawng thlawh khumin khawthlang lam ramah an zin ta deih mai thin a. Mahse, an zaina Aizawl a ni tlat bawk si. Mumbai musician, Bollywood star ho te nena thawk ho thin ten Indian music leh Western music, Indian music leh culture thlawh bo san chuang lova an chawlhpawlh thiam zia te hian ngaihtuahna a ti thui duh teh a nia. Engatinge mawni le, kan mizo musiciante hian kha lamah khan vai ho an tluk loh tlat tehreng ni. Heti lamah hian kan thangharh a ngai tak zet lomaw? Kan hranghlui zaithiam leh hlaphuah thiamte kan phaklo deuh niin a lang. Hla thluk ingeuh deuh deuh sap hoin a an uar em em R&B (Ryhtm & Blues) ang kal phungte hi keini mizo tawng kal phung nen te hian a in hmeh ve vaklo niin a lang. Chutiang thil thleng chuan thang lo thar zel ten ngaihtuahna siam thar zel a va that hmel ve..?
Hla reng reng hi a phuahtu emaw a thluk siamtu emaw te hian mite hmuh a an tlangzarh hmaa an ngaih pawimawh ber mai chu “a thluk mawi leh mawi loh” a ni duh khawp mai. Hla thluk mawi siam tur chuan a “Chord” tih tam teh vak lam pawh a ni hran lo. Tih changkan tum luat a athluk kal phung han tih ingeuh vak lam pawh a ni chuang hek lo. A thluk siamtu rilru a lunglenna thuk tak leh rem hriatna inphumru chu hla tha leh thluk mawi siam chhuak tur chuan thil pawimawh ber a ni a. Sap ho music kalphung tha ber ber lam ringawta rilru dah vek chunga mizo hla tha tak lo sual thluk ve ngawt chu thil har deu mai chu a ni. Keimahni culture (hnam zia) leh khawsak phung hrim hrim thlawhbo san ching mite tan mizo hla tha tak leh thluk mawi tak sual thluk ve ngawt nachhan tur a awm lo. Zosap missionary ten Christian sakhua rawn keng lutin hla thluk thar min rawn pe a, chu zoram tharah chuan sakhaw thar leh hla thluk thar a lo awm ta a. Zo rimawi kalphung chuan “Western Music” nghahchhanah a neih a ngai ta tlat a. Western Music chu mizo zaithiamte leh musiciante tui chawina ber a lo ni ta. Lalawithangpa hla thluk lo hman thinte chu hria aram pawh an awm ta mang lo. Amaherawhchu, sap ho te, vai ho te nen kan ziik chhuahna leh khawsakna ram boruak a in ang miau silova. Hnam hrnag, lunglen dan hrang nei kan nihna lai tak chu zuk hriatthiam a pawimawh tak zet a. Chu thil zuk hriatthiamna chuan khawthlang hla thluk zuk hrethiam em em chunga mizote duh zawng ni tlat si, hla thluk siam chhuah thiamna, thil thlir dan zau zawk leh fim tak a pe thei dawn a ni.
Awle, kawng hrang hranga kan han thlir zau velna atang khan 1970 hnu lama, Mizoram zaithiam lar ho, tun huna “hranghlui” tia kan koh tak hlawmte kha tehfung chi hrang hranga teh pawhin anlo chhuanawm hlawm khawp mai.
Rimawi khawvel tukverha zoram a lo dak chhuak ve ta leh, chawp leh chilha sap zaithiam thu leh hla leh rimawi zoram khawvela lo thleng khawm ve ta zung zung mai te chu thiam taka hmanrua a hmang chung zelin hla thluk thar kan hnam nun nena in mil em em min hlui bawk a, zofate’n “rimawi khawvel” an her danglam a ni ber awm e.
“Zo rimawi khawvel” hmasawnna thlen tute zinga, a pawimawh ber pawl C.Lalrinmawia’n “Tlaitla engmawi” tih hla zofate tana min lo chhawp chhuah sak zet hi chu zo rimawi chanchinah chhinchhiah reng a ni tawh ang a, mi chi hrang hrangin rawn sa chho ve thin mahse, a sa hmasa bertu leh a phuahtu hi ngaihhlut ber a ni tawh ang a. Zo rimawi chanchinah bung pawimawh ber a luah reng tawh ang.
Pu C.Lalrinmawia hian a nupui, “Thahmingliani” tia a lo phuah chhan Pi Lalchhuanawmi nen fa 2, mipa leh hmeichhia annei a. An fate hian pawl 12 an zir mek a, tunah hian Chaltlang field sir hret, a chhuah lampang hmun thengthaw nuam taka, an chenna in, nu leh pa atanga an ro chunah, nupui fanaute nen hlim takin an cheng mek a ni.
TLAITLA ENGMAWI
Phuahtu : C.Lalrinmawia
Satu : C.Lalrinmawia, Joseph Zaihmingthanga, Chaltlang Br YMA Zaipawl feat C.Lalrinmawia
Phuah kum : October 1973
Aw ka thlir vel tlaitla engmawi
Aw ilo mawi chuang mange
Sakhmel thar, hrai leng ten lo lawm
Cham rih la, tlaitla eng, mawi no ruai.
La la la, la la la, la la la.
Cham rihla hrai leng zawng lunglawm nan maw,
I liam tur maw lo ngui zo ta
Kum pui sul lo vei hian
Hun leh ni te a lo dang
Ka ngai thin lenrual hlui then hnu te
Lenkawl cham duai tlang dum dur
Leh ruam dai sirva leng ten
An lo bel e, riah buk ram daia’n